Hestöfl

Ég hef aldrei skilið af hverju hestöfl eru nýtt sem mælieining á kraft.

Ég hef farið á bak hestum sem eru mun kraftmeiri en eitt hestafl.

Hestöflin á þessari mynd eru margfalt fleiri en hestarnir.

Grýlukerti

Leiðinlega skýringin á grýlukertum er sú að grýlukerti séu merki um lélega einangrun.

Mér er sama um það.

Þau setja ævintýralega svip á húsið.

Á disk

Fuglinn er vanur að fá sinn mat framborinn á disk.

Stendur á brúninni og bíður spenntur eftir næsta rétt.

Leifar frá gömlum tíma

Á Suðurlandsbraut er búið að skafa tímann af húsi og merki frá síðustu öld komið á ný í dagsljósið.

Bifreiðar og landbúnaðarvélar.

Út úr þessu húsi komu Lödur og Rússajeppar.

Ég man ekki eftir landbúnaðarvélum frá þeim.

En margir af bílunum sem þeir seldu höfðu svipaða aksturseiginleika dráttarvéla.

Óviti

Hvað á að kalla vita sem er uppi á þurru landi og lýsir ekki?

Ég held að óviti lýsi honum best.

Brauðmolar

Sumir fagna hverjum brauðmola sem er hent til þeirra.

Dyr

Fyrir innan þessar dyr er skrifstofa forsætisráðherra.

Það er engin girðing, ekkert hlið, ekkert kastalasýki á leiðinni.

Bara nokkur þrep.

Mér finnst gott að búa í landi þar sem allir geta barið að dyrum hjá forsætisráðherra.

Svart/hvítt

Stundum hallast ég að því að arkitektar landsins hafi ekki ennþá eignast litaprentara.

Myndir af mörgum nýjum húsum eru eins.  Sama hvort þær séu í lit eða svarthvítu.

Sem betur fer eru til undantekningar á því.

Ofur Máni

Síðustu helgi breyttist tunglið í ofurhetju.

Máninn var ekki bara Máni þessa helgi.  Hann var Ofur Máni.

Ég veit ekki hvaða ofurkrafta hann fékk en hann var stór og sterkur.

Snjór

Ég hef enþá snjó í kringum mig.

Þá birtir yfir öllu og hjólaferðirnar verða skemmtilegri.