Mastrið

Háspennumastur munu seint teljast eitthvað fyrir augað.

Með réttir lýsingu er samt hægt að bæta þau stórlega.

Bryggjan

Fyrir mörgum árum var líf á þessari bryggju.

Bryggjan náði að landi, skip og bátar komu með fisk og vörur.

í dag er bryggjan komin út á haf og hefur engan tilgang.

Annan en að vera þar sem hún er.

Önd án reiðhjóls

Sá þetta reiðhjól hálft í kafi í tjörninni.

Líklegast hafa endurnar verið hættar að nota það. 

Snjór

Snjórinn kom í stutta heimsókn, lýsti upp skammdegið en fór fljótt aftur.

Ég man eftir þeim tíma að snjórinn kom fyrir jól og fór ekki aftur fyrr en eftir páska.

Eldingar

Þrumuveður er ekki algengt á íslandi.

Yfirleitt líða nokkur ár á milli þess að ég verð var við þrumuveður.

Ég var ekki á réttum stað til að sjá eldingarnar almennilega í gær en ég sá blossa og heyrði þrumur.

Fyrir rúmu ári lenti ég í útlensku þrumuveðri.

Þá fékk ég stúkusæti.

Litli geitungurinn

Á hverju sumri koma farfuglarnir frá útlöndum og geitungarnir úr búunum.

Fólk hefur misgaman að geitungum og sumir virðast ekki hafa neitt gaman að þeim.

Eitt sumarið kom ungur vinnufélagi minn inn með geitung sem hann hafði veitt fyrir utan húsið og fór stoltur með veiðina inn á skrifstofu til annars vinnufélaga. 

Eftir að hafa skoðað geitunginn benti maðurinn stráknum á að fara með geitunginn yfir á skrifstofuna við hliðina.  Sá sem þar situr hafði líka mjög gaman að geitungum.

Það var ekki fyrr en öskrin heyrðust út úr skrifstofunni að hann mundi að vinnufélagin hafði ekkert gaman að geitungum.  Hann var eiginlega dauðhræddur við þá.

Geitungurinn á myndinni tengist sögunni ekki á annan hátt en að vera geitungur.

Veisla

Það þarf ekki alltaf flókna rétti til að búa til veislu.

Gæsirnar við Glæsibæ fundu niðursneiddan brauðhleif sem þær skiptu bróðurlega á milli sín.

Gamla druslan

Við veginn út úr borginni sá ég þessa gömlu druslu.

Fædd fyrir um 40 árum og tíminn hefur ekki farið vel með hana.

Í höndum laghentra getur druslan náð fyrri dýrð og orðið að glæsivagni á ný.

Horft til himins

Á kvöldin horfi ég oft upp í loftið og leita að norðurljósum.

Ég hef ekki fundið þau nýlega.

Það er ekki laust við að ég sakni þeirra.

Fjarlægð stjarnanna

Nýlega horfði ég upp í himininn og skoðaði stjörnurnar.

Svo rifjaði ég upp að flestar stjörnurnar eru ljósár í burtu.

Þá gerði ég mér grein fyrir því að ég var að horfa á stjörnurnar þar sem þær voru fyrir mörgum árum. 

Skyldu þær vera á sama stað í dag?