Kajak

Það þarf ekki stóran bát, öfluga vél eða stórt segl til að fara fara á sjó.

Lítill einsmanns kajak er allt sem þarf.

Horft af brúnni

Í gær stóð ég á einni göngubrúnni yfir Miklubraut og horfði á þrjár akreinar yfirfullar af bílum.  Sjálfum þykir mér hundleiðinlegt að vera bíl hálfföstum í umferð og ég get ekki ímyndað mér að nokkur annar geti haft ánægu af því að sitja í bíl og hafa ekkert annað að horfa á í lengri tíma en afturendann á bílnum fyrir framan. 

Ég fór að velta fyrir mér hvort það væri ekki til einhver lausn á þessum umferðarvanda.  Lausn sem við myndum öll græða á.

Þessi umferðarþungi er ekki bara að kosta tíma.  Hann er líka að kosta peninga.  Peninga sem brenna upp í vélinni.  Bíllinn eyður mun meira eldsneyti á því að vera stöðugt að stöðva og taka af stað aftur.   Í stað þess að aka á jöfnum hraða.

Ekki má gleyma kostnaði samfélagsins við viðhald vega.  Því meiri sem umferðin er því meiri þörf er á viðhaldi veganna.  Það er kostnaður sem lendir á okkur öllum

Þessi umferðarþungi er ekkert náttúrulögmál. 

Það á ekki að þurfa að eyða meiri tíma kyrrstæður í bíl á Miklubrautinni en á ferð.

Göturnar þurfa ekki að fyllast af bílum tvisvar á dag þegar fólk hópast í og úr vinnu.

Lausnirnar eru nokkrar og eiga það allar sameiginlegt að borga með sér frá fyrsta degi.

Flestir bílarnir á götunum eru gerðir fyrir fjóra farþega og einn ökumann.  Samt eiga flestir bílarnir það sameiginlegt að í þeim er ökumaður en engin farþegi.  Það er augljóst að því fleiri sem eru í hverjum bíl því færri bílar þurfa að vera á götunum á sama tíma.

Fólk sem býr í sama hverfi og vinnur á svipuðum slóðum getur skipst á að aka hvort öðru í vinnuna.  Ef fjórir fara saman í bíl þá er eldsneytiskostnaðurinn á hvern 25% af því sem hann væri ef aðeins einn væri í bílnum og það væri þrem bílum færra á götunni.

Það eru líka til fleiri ferðamátar en einkabíllinn.

Það er líka hægt að taka Strætó.  Fyrir hvern farþega þar sem ákveður að skilja bílinn eftir heima og taka strætó er einum bíl færra í umferðinni.  Þar munar um hvern og einn.  Svo má ekki gleyma því að á Miklubrautinni hefur Strætó sér akrein þar sem hann brunar framúr kyrrstæðum einkabílum.

Sjálfur fer ég oftast hjólandi í vinnuna.  Hjólaleiðum í borginni hefur farið fjölgandi og stefnt er á að fjölga þeim mun meira á komandi árum.   Það er hægt að hjóla nær alla daga ársins og í mínu tilfelli munar það um 10 mínútum á ferðatíma við bestu aðstæður á bíl og að fara á hjóli.  Það er tími sem mér þykir mjög vel varið.  Ég nýti tíman sem fer í ferðalög í og úr vinnu til hreyfingar.

Það er nokkuð ljóst að það er hægt að leysa umferðarvandann ef við viljum. 

Ég legg mitt af mörkum.  Hvað með þig?

 

Fossar

Ég hef oft farið upp og niður Elliðaárdalinn.

Á leiðinni eru margir fossar.

Ég hef aldrei talið þá svo ég veit ekki hvað þeir eru margir.

Lækurinn

Mér líður alltaf vel nálægt rennandi vatni.

Það skiptir ekki stóru máli hvort það sé stórfljót eða lítill lækur.

Ég get alltaf tekið mér góðan tíma til að horfa.

Girðing forsetans

Við Bessastaði er hlið og girðing til að halda óboðnum gestum í burtu.

Mér finnst gott að búa í landi þar sem það þarf ekki öflugri girðingu en þetta við forsetasetrið.

Lækurinn og húsið

Þegar hús er byggt þar sem lækur rennur er bara um tvennt að ræða.

Byggja húsið við hliðina á læknum eða yfir lækinn.

Þetta hús var byggt yfir lækinn.

Sem betur fer.

Egg

Ég sá þetta egg á brún Látrabjargs.

Ég er ekki viss hvort eggið  hafi verið opnað utanfrá eða innan.

Fossinn

Þegar ég hjóla heim úr vinnu fer ég nær alltaf í gegnum Elliðaárdalinn.

Það er smá krókur en fyllilega þess virði.

Geta komist langt upp í sveit án þess að fara frá borginni.

Himinn

Þetta kvöld eins og oft áður skipti himininn um lit úr bláum í rauðan og gulan..

Á sama tíma skiptu umferðarljósin litum og urðu gul og rauð.

Of seint eða á réttum tíma?

Eitt sumarið sá ég flugu standa á blómi.

Ég reyndi að vera fljótur, greip myndavélina smellti af.

Á sama tíma ákvað flugan að fara.

Svo er það spurningin. 

Tók ég myndina augnabliki of seint eða akkúrat á réttum tíma?