Gamli Saab

Innan um alla fornbílana á hafnarbakkanum fann ég þennan Saab. 

Þessi Saab var ólíkur öllum öðrum bílum frá þeim sem ég hef nokkurntíman séð. 

Hann var í raun langt á undan sinni framtíð.

Þetta hefur líklegast verið annaðhvort þeirra hugmynd af öruggum ofursportbíl eða kanski er þetta dæmi um hinn goðsagnakenda sænska húmor.

Kassi

Í miðbæ Reykjavíkur sá ég þennan kassa á gönguför.

Hvert hann var að fara, hvaðan hann var að koma eða hvað var í kassanum hef ég ekki hugmynd.

Skipið sem var

Í gömlu hafbeitinni í Vogum er gamalt skipsflak.

Ég get engan vegin áttað mig á því hvað þetta skip var áður en það breyttist í flak.

Nátttröll

Ég hélt alltaf að nátttröll væru séríslensk fyrirbæri sem fyndust ekki annarsstaðar. 

Í Maastricht fann ég nokkur nátttröll sem höfðu verið í karnevali og dagað upp í búningum. 

Sem betur fer hefur engum dottið í hug að taka þau í burtu.

Gamli strætóinn

Á 17.júní sá ég þennan gamla strætisvagn. 

Vagninn kom til landsins fyrir rúmum 40 árum þegar við tókum upp hægri umferð.

Strætisvagnarnir sem voru notaðir á undan hentuðu illa eftir breytingu því farþegar vildu frekar fara út á gangstétt en götu.

Þessi vagn mynnti mig á þann tíma þegar ég var að taka strætó í fyrsta skipti.  Í þá daga þótti hann gamall.

Þetta var á þeim tíma sem ég skildi leiðarkerfið og bílstjórarnir voru í bláum einkennisbúningum með kaskeiti.

Á þessum tíma fór leið 4 Hagar - Sund.

Í dag fer Fjarkinn Hlemmur - Fell. 

Ég lendi alltaf í stórvandræðum þegar ég þarf að taka strætó.  Ég veit aldrei hvaða vagn fer hvert og hvar ég á að taka hann.

Kraftur

Þegar ég horfi á allt það grjót og gróður sem sjórinn hendir langt upp á land. 

Átta ég mig á því að það býr ótrúleg orka í sjónum.

Ný kirkja

Samúel í Selárdal málaði nýja altaristöflu til að gefa kirkjunni á staðnum.

Þeir sem þar réðu vildu ekki fyrir nokkurn mun hafa þessa altaristöflu í sinni kirkju.

Samúel kunni lausn á því.

Ef þeir vilja ekki hengja altaristöfluna í kirkjunni

Byggi ég sjálfur kirkju utanum altaristföfluna.

Bjalla

Fyrstu 14 æviárin mín var annar heimilisbíllinn WV Bjalla.

Til að byrja með var ég mjög sáttur.  Það voru bjöllur á næstum öllum heimilum og ég trúði því að þetta væru bestu og flottustu bílarnir.

Undir lokin vildi ég helst vera með hauspoka þegar ég sat í bílnum og vonaði að engin sæi mig.

Allir aðrir voru komnir á nýja og nútímalega bíla með miðstöð sem hitaði bílinn á veturna og vatnskælda vél frammí.  Sumir bílar voru meir að segja með sjálfskiptingu, vökvastýri, FM útvarpstæki með kasettu og þeir allra flottustu voru með rafdrifnar rúður.

Loksins fékk ég mitt fram og það var keyptur nýr bíll.

Nokkrum árum síðar var kominn tími fyrir mig að kaupa mér minn fyrsta bíl. 

Ég leitaði lengi að bjöllu sem var í góðu ástandi en fann enga. 

Ég saknaði mikið gömlu bjöllunnar. 

Bjallan á myndinni er ekki bjallan sem ég var að segja frá.

Litli maðurinn

Það er ekki laust við að maðurinn sem stendur á bjargbrúninni virki frekar lítill miðað við bjargið.

Andlit á himni

Oft er hægt að rýna í ýmsa hluti og sjá ótrúlegustu hluti úr þeim.

Síðasta vetur fór ég að skoða norðurljósin.

Ef vel er skoðað má sjá andlit á himni.