Tré

Á fjölförnum gatnamótum er tré sem ég hafði aldrei séð fyrr en jólaljósin voru sett á það.

Á öðrum árstímum er tréð ósýnilegt.

Veiði

Það eru margir góðir veiðistaðir og margir eiga sinn eftirlætis veiðistað.

Suma veiðistaði þarf að borga stórfé fyrir að fá að komast á og á aðra þarf að sigla með bát langa leið.

Aðrir staðir eru fríir, inni í borginni og þarf bara að ganga nokkur skref.

Og þar er fiskur tilbúinn að bíta á.

Dreki

Ég sá dreka á flugi.

Hann spúði ekki eldi og var ekki ógnandi.

Heldur flaug tignarlega yfir borginni.

Spegill

Þegar sjórinn minnir á spegil kemur oft upp löngunin að komast út á sjó með veiðistöng og veiða.

Snjóhjól

Ég nota reiðhjól allt árið.

Það er ekkert mál að hjóla á í snjó.

Í stað þess að fara með kúst og sópa snjóinn af bílnum er mun þægilegra að hrista hjólið og þá er það tilbúið.

Hrímhrísla

Þegar frystir fá hversdagslegustu hlutir nýjan blæ.

Ég hafði aldrei tekið eftir þessari hríslu við bakka Elliðaár.

Ekki fyrr en veturinn og frostið klæddu hrísluna í nýjan búning.

Sjóstöng

'Eg hef veitt á í ám og vötnum. 

Best finnst mér samt að komast á bát út á sjó með veiðistöng.

Upplýst ský

Ég skil vel af hverju gangstéttir og götur eru upplýstar í myrkri en mér er með öllu ómögulegt að skilja af hverju skýin eru upplýst. 

Verra þykir mér þó að stjörnur og norðurljós eru lýst í burtu svo oft þarf að fara í örugga fjarlægð frá byggð á heiðskýru kvöldi til að horfa til himins.

Jólasnjór

Það er alveg sama hversu mikið er skreitt.

Hversu skær ljósin eru og litirnir margir.

Jólaskraut verður alltaf að hafa jólasnjó til að virka.

Norðurljós

Ég hef ferðast víða um heiminn og séð margar ljósasýningar með margskonar rafljósum.

Flottustu flottustu rafljósin eru samt alltaf norðurljósin sem sjást á íslenskum næturhimni.