Á hjóli í snjó

Sumir halda að snjór og reiðhjól passi ekki saman.  Ef það snjói þá sé ekki hægt að hjóla.

Það er ekki rétt.  Oft hjóla ég í vinnuna þótt það sé snjór á jörðinni. 

Fyrir nokkrum árum var ég á skíðasvæði þar sem margir nýttu sér reiðhjól.  Nokkrir höfðu meir að segja fest skíðafestingar á hjólin sín.

Einn gekk þó skrefinu lengra og útbjó hjólið sitt til að hjóla á hvaða snjó sem er.

Glíma

Hjá Geysi í Haukadal er búið að reisa mynnisvarða um íslensku glímuna.

Styttu sem sýnir tvo menn glíma.

Þegar ég fór þangað með hóp af erlendum ferðamönnum vakti styttan óskipta athygli.

Þau gátu bara ekki áttað sig á því hvað mennirnir voru að gera.

Faxi

Rétthjá Gullfossi er annar foss sem er ekki eins frægur.

Rétt við þjóðveginn sem gerir öllum létt fyrir að aka hratt framhjá.

Mér finnst samt jafnnauðsynlegt að stoppa hjá Faxa eins og að stoppa hjá Gullfossi.

Gullfoss

Seinast þegar ég sá Gullfoss var hann í vetrarklæðum.

Þau fara honum vel.

Ekki ganga

Á Þingvöllum sá ég þetta skilti.

Þegar ég horfði á skiltið fór ég að velta fyrir mér hvort það væri bannað að ganga á grasinu eða hvort það mætti ekki vera í skóm á grasinu.

Ég hélt mig af grasinu og fór ekki úr skónum.

Laxastiginn

Við fossinn Faxa er laxastigi.

Stigi gerður svo laxarnir komist ofar í ánna.

Það eru svona stigar um land allt og virka vel.

En mér var sagt að einhverra hluta vegna vildi laxinn ekki fara upp þennan stiga.

Ég held að það sé vegna þess að laxarnir eiga ekki erindi ofar í ánna.

Strokkur

Um helgina fór ég með hóp af Þjóðverjum og einn Svía að skoða Gullfoss og Geysi.

Mörg í hópnum voru mjög spennt því þau höfðu aldrei áður séð goshver gjósa.

Áður en við komum á staðinn þá sagði ég hópnum að Strokkur gysi alltaf á hverjum einasta morgni á slaginu tíu.

Þá fór kliður um rútuna þangað til einn ferðamaðurinn kallaði eymdarlega aftan úr rútunni.

"Klukkan er korter yfir tíu."

Þeim létti stórlega þegar þau fengu að vita að Strokkur gysi á um tíu mínútna fresti.

 

Þingvellir

Kjarval fór oft á Þingvelli til að mála.

Það er útskýrir að hluta af hverju mér finnst oft eins og ég sé inni í Kjarvalsmálverki þegar ég kem á Þingvelli.

Máfur á stöng

á bökkum tjarnarinnar eru nokkrar fánastangir.

Augljóslega hafa þær verið settar upp svo það sé hægt að flagga við hátíðleg tilefni.

Máfarnir fundu önnur not fyrir stangirnar.

Fínir útsýnisturnar.

Slippurinn

Gamli Slippurinn hefur alltaf haft aðdráttarafl.

Þar eru oft ný glæsileg skip við hliðina á gömlu ryðdöllum.

Þegar þessi mynd var tekin ryðgaður togari við hliðina á ryðguðum körfubíl.

Annar er kominn á sjó, hinn ekki.